• Редакција Gol.mk
Дисциплинската комисија на Фудбалската федерација на Македонија ќе има многу работи и во наредните денови. Имено, натпреварот од последното есенско коло меѓу Каменица Саса и Скопје не го дочека крајот, а гостинските фудбалери се пожалија на физички напад.
Сепак, од Каменица Саса со соопштение се обидоа да ја расветлат ситуацијата и прстот го вперија кон голманот на Скопје, Гоце Јовчев
„ФК Каменица Саса го осудува секое насилство на фудбалските натпревари.
Во досегашната 56 годишна фудбалска историја во Македонска Каменица немало прекин на натпревар поради настанат инцидент. Сите гостински екипи, секогаш биле пречекани домаќински и достоинствено.Иницијатор на вчерашниот инцидент беше гостинскиот играч - резервен голман, Гоце Јовчев, кој што најпрвин од резервната клупа направи вербален напад врз двајца наши фудбалери. За истото од страна на главниот судија Гоце оправдано добива црвен картон. На излегување од резервната клупа, на пат кон соблекувалните, исклучениот играч, почна вербално со погрдни зборови, пцовки и покажување на срамни и недолични гестикулации да ги навредува чесните навивачи на ФК Каменица Саса, кои беа собрани надвор од заградениот дел на стадионот, на надворешната страна на оградата.
Понатаму, Гоце продолжи со навредите, и истиот физички нападна член на управата на ФК Каменица Саса (кој официјално беше пријавен кај делегатот за присуство на натпреварот), кој што во обид да го смири Гоце, во неговото однесување, беше физички нападнат од страна на Гоце... Во понатамошно дивеење, Гоце Јовчев го зеде корнер знаменцето, и со острото шило од истото, се обиде да ги нападне присутните редари и да им нанесе физички повреди (момент кој се гледа на видеото во прилог).
Во целата ситуација, настанатиот инцидент беше на просторот пред соблекувалните, надвор и далеку од теренот за игра. Од овие причини, немаше никаков основ натпреварот да биде прекинат. Официјалните лица од ФК Скопје (претседателот и останатите членови од управата и клубот) неоправдано ги повлекоа своите играчи од теренот. Истите цело време вршеа вербални притисоци кон делегатот и судиите за да натпреварот биде прекинат. Не им дозволуваа на своите играчи да влезат на теренот и да го доиграат натпреварот, за што настана и нивна вербална расправија и меѓусебна кратка физичка пресметка на средината од теренот.
Од страна на ФК Каменица Саса и присутните полициски службеници, беа овозможени сите услови за да се продолжи натпреварот, кои што како такви беа побарани од делегатот. Беа отстранети насобраните гледачи од надворешната страна на стадионот и на стадионот како засилување пристигнаа уште неколку полициски службеници.
На прашање на делегатот поврзано со безбедноста, од страна на одговорниот полициски службеник му беше одговорено дека од негова страна се обезбедени сите услови за продолжување на натпреварот и дека истите ја гарантираат безбедноста на сите присутни на теренот (вклучително и играчите од гостинската екипа). По вака дадените гаранции од страна на одговорниот полициски службаник, поврзани со безбедноста на теренот, зошто претседателот на ФК Скопје ѝ нареди на неговата екипи се повлече и не го доигра натпреварот, на нас како клуб не ни е јасно.
И ние во минатото бевме напаѓани на останати стадиони, па секогаш во интерес на спортот сме ги доигрувале натпреварите. Затоа бараме од страна на ФФМ, на објективен начин да се преземат сите мерки за расчистување на настанот, и да се донесат одлуки во согласност со пропозициите и правилниците на ФФМ. За ваквите наши тврдења, како доказ за горенаведното, во прилог објавуваме и соодветен видео материјал“, се вели во соопштението на Саса.
До пред прекинот натпреварот во Каменица беше израмнет и резултато гласеше 1-1.
