• Мартин Танасковски
Чедомир Јаневски, стратегот на Вардар, по мечот против Розенборг му честита на противникот за победата во Лига Европа и истакна дека неговиот тим покажал храбра игра и дека натпреварот минал во егал, и покрај поразот од 1-3 на „црвено-црните“.
Македонскиот шампион рамноправно се носеше со Розенборг во првиот дел, а потоа, следеше невнимание во играта кое донесе уште два гола во мрежата на Гачевски. Пред самиот финиш, Фелипе со ефектен гол го намали поразот и го постигна првиот гол за Вардар во Лига Европа.
„Мислам дека и покрај поразот, натпреварот мина во егал, рамноправно. Двата тима пробаа да играат фудбал. Имавме свои шанси, онаа прилика на 0:0 кога ја погодивме стативата. И кога нема да се даде гол, се прима, тоа е така во фудбалот. Розенборг реализираше од пенал, но претходно на 30 метри можеше да биде направен ситен прекршок, но не го направивме. Тоа е резултат на нашето неискуство. И после 1:0 имавме шанси, пробавме да играме офанзивен фудбал, но вечерва немавме во нашиот тим вистински голгетер. Честитки за мојот играч (Барсегјан н.з.) кој играше на таа позиција, даде се од себе. Во вториот дел бевме повторно рамноправни, повторно имавме шанси, и примивме втор гол кој што го одлучи овој натпревар. После тоа направивме измени, внесовме во игра двајца млади играчи. Успеавме да постигнеме гол, кој што за жал дојде во финишот и не можеше ништо резултатски да промени. Сакам да кажам дека сум задоволен од играта на мојот тим, бидејќи беше поинаква од првиот меч против Зенит на домашен терен во Лигата на Европа. Сигурен сум дека ако продолжиме во овој стил како вечерва, бодовите ќе дојдат на некој од следните натпревари. Денеска победи тимот кој што имаше повеќе искуство во вакви мечеви и ги реализираше своите шанси“, изјави Јаневски.
Вардар има два порази на два меча во Лига Европа, а наредниот предизвик е дуел со Реал Сосиедад во Скопје.
