• Горан Упале
Со поразот на Бразил од Аргентина во вторникот на Маракана (0-1), заврши една од најимпресивните серии во светот на спортот.
Имено, Бразил забележа историски пораз, затоа што до синоќа не знаеше како е да се загуби дома во квалификациите за Светското првенство. На домашен терен одигра 64 натпревари, само 13 пати ремизираше, со дури 51 победа!
Сè додека Аргентина не дојде на „Маракана“ за да ја прекине таа серија. И не само тоа, туку и да поведат во меѓусебните дуели, откако и двете репрезентации до оваа средба имаа по 39 победи. Сега „гаучосите“ имаат една победа повеќе. Главно благодарение на Николас Отаменди, човекот кој ја направи разликата во гладијаторската пресметка во Рио де Жанеиро.
Аргентина со оваа победа не само што се врати на врвот на табелата, туку и ја зачува лидерската позиција на ранг-листата на ФИФА, откако Франција во вторникот ремизираше со Грција и ја пропушти можноста да ја престигне.
