• Саше Љолес
Најновиот член на Манчестер Сити, Јошко Гвардиол, беше пресреќен по победата на неговиот тим над Севиља во Суперкупот на УЕФА. „Граѓаните“ стигнаа до трофејот по подоброто изведување пенали, а ова е прва титула за Хрватот, кој тукушто пристигна во клубот.
„Се чувствувам прекрасно. Пресреќен сум затоа што триумфиравме и се закитивме со овој трофеј. Суперкупот е натпреварување во кое не може да игра било кој и оваа шанса ја немате секој ден. Навистина сум задоволен од победата.
Знаевме дека Севиља има исклучително квалитетен тим и се подготвуваме добро за нив. Мислам дека контролиравме поголем дел од играта, но имаше и моменти кога го загубивме нашиот фокус. Сепак, сметам дека сосема заслужено славевме и го освоивме престижниот трофеј на УЕФА.
Уживам во секој момент откако пристигнав во Манчестер. Ова е неверојатен клуб, ние сме актуелни европски шампиони и сакаме да останеме на тронот. Не чувствувам голем притисок, затоа што сум опкружен со играчи и тренер од светска класа. Сите заедно целиме кон нови победи и трофеи“, заклучи хрватскиот репрезентативец.
Јошко Гвардиол пред само неколку денови пристигна во Манчестер Сити од редовите на РБ Лајпциг. „Граѓаните“ за хрватскиот интернационалец исплатија сума од деведесет милиони евра и се очекува тој да биде одлично засилување за дефанзивата. Неговиот тим се закити со трофејот во Суперкупот и делува навистина силно и непобедливо, па затоа Сити е сѐ уште прв фаворит за сите трофеи и оваа сезона.
