• Зоран Мишевски
Грчката влада размислува да ги врати гледачите на фудбалските натпревари, но под посебна процедура. Фудбалските љубители и навивачите во Грција во иднина ќе мораат да ја користат владината апликација за дигитална идентификација на своите мобилни телефони за да купат влезници за натпреварите.
Ова е мерка за сузбивање на насилството во грчкиот спорт, поради кое фудбалските клубови мораа да ги затворат своите стадиони за навивачите во период од два месеци, кој истекува на 12 февруари. Оваа одлука уследи по смртта на полицаец, кој минатиот месец беше погоден со факел за време на навивачки немири во Атина.
Владината апликација за дигитална идентификација се користи во Грција преку мобилните телефони од 2022 година и наликува на системот што се користи за вчитување на билети на аеродромите.
