• Саше Љолес
Фудбалската јавност во Чешка деновиве е поделена поради необичен и контроверзен случај поврзан со напаѓачот на Славија Прага, Томаш Хори. Иако пред неколку недели доби суспензија поради груб и несоодветен потег врз противнички играч, истиот овој фудбалер е прогласен за најдобар играч на месецот.
Инцидентот се случи во текот на првенствен натпревар, кога Хори го удрил противничкиот голман во меѓуножје надвор од активната игра. За ваквиот потег веднаш бил санкциониран со црвен картон, а дисциплинската комисија дополнително му изрекла суспензија од шест натпревари.
Она што најмногу ја шокираше јавноста е фактот дека, и покрај инцидентот и казната, напаѓачот бил избран за играч на месецот. Одлуката предизвика бројни реакции, бидејќи дел од навивачите и спортските аналитичари сметаат дека фер-плеј принципите мора да бидат составен дел од критериумите при доделување вакви признанија.
Други, пак, тврдат дека изборот се темели исклучиво на формата и статистиката на играчот, независно од неговото дисциплинско досие.
Случајот повторно го отвора прашањето за тоа колку дисциплинските прекршоци треба да влијаат врз индивидуалните признанија, како и каква порака се испраќа до младите спортисти и до јавноста кога награда се доделува веднаш по груб прекршок.
