• Мартин Танасковски
Поранешниот претседател на Фудбалската федерација на Македонија, Илчо Ѓорѓиоски, ќе се брани од слобода откако Основниот кривичен суд Скопје донесе одлука за укинување на мерката притвор и прифати гаранција во вредност од 500.000 евра.
Информацијата ја потврдија и од Кривичниот суд за „Фокус“, од каде соопштија дека на Ѓорѓиоски му е укинат притворот и му се определени мерки на претпазливост.
„Укинат му е притворот и определена е гаранција со мерки на претпазливост“, информираат од судот.
Со оваа одлука, поранешниот прв човек на македонскиот фудбал ќе го очекува почетокот на судската постапка на слобода, но под условите и ограничувањата што му ги наложил судот.
Во истиот предмет е опфатен и поранешниот претседател на ФФМ, Муамед Сејдини, кому претходно му беше определен домашен притвор. За него е прифатена гаранција во висина од еден милион евра.