• Горан Упале
Мјалби АИФ, мал клуб од шведско село со едвај илјада жители, ја напиша една од најубавите спортски бајки на модерното време. Ја освои титулата шампион на Шведска, на три кола пред крајот на шампионатот, и тоа победувајќи го големиот Гетеборг со 2-0. Во 2016 година, клубот беше на работ на банкрот, талкајќи во третата дивизија и едвај избегнувајќи целосен колапс. Денес овој мал клуб е шведски фудбалски шампион.
Првиот гол на натпреварот го постигна напаѓачот Јакоб Бергстром во 21. минута - и тоа на каков начин. Во стилот на познати фудбалски асови, речиси со „ножички“.
„Целосна лудост. Постигнав гол со „ножички“ во ваков натпревар! А јас, кој досега најмногу постигнував голови од прекини – се чувствував како Вејн Руни“, рече Бергстром.
Мјалби е познато повеќе како мирно одморалиште, отколку како фудбалски центар: кампови на брегот, недопрена природа, а стадионот е само на неколку метри од плажата. До таму нема возови или автобуси - можете да стигнете само со автомобил, преку пат низ огромни шуми. Но, успехот ослободи лавина од ентузијазам.
Навивачката група „Силастрибарна“ порасна од своите првични 30 фанатици на над 500 лојални навивачи. Пред почетокот на сезоната, речиси никој не веруваше дека Мјалби може да стигне до врвот. Обложувалниците нудеа коефициенти над 150:1 - што значи дека им беа дадени помалку од 1% шанси за освојување на титулата.
Но, Мјалби ги сврте сите коефициенти против нив: од десеттото коло до крајот тие беа на врвот на табелата и никогаш не го отстапија водството.
