• Иван Димовски
Фоларин Балогун не сакаше да навлегува во политичките контроверзии по елиминацијата на САД од Белгија (4-1) во осминафиналето на Светското првенство. Американскиот напаѓач, чиј настап беше одобрен по контроверзната одлука на ФИФА да му ја поништи суспензијата, истакна дека најмногу го боли поразот и испаѓањето од Мундијалот.
Иако се најде во центарот на вниманието поради одлуката на ФИФА и наводните политички притисоци, Балогун не успеа да остави посериозен впечаток против Белгија, која без поголеми проблеми славеше убедлива победа. По натпреварот, тој нагласи дека цело време ги почитувал одлуките на ФИФА и дека не бил вклучен во процесот кој се водел зад сцената.
„За мене беше едноставно. Ја прифатив одлуката кога добив црвен картон, а на ист начин ја прифатив и одлуката суспензијата да биде поништена. Потоа остана само натпреварот, а Белгија беше подобар противник. Ќе ми треба време да сфатам сè што се случи. Тешко е да се објасни што ни се случи, но сигурно не одигравме добро. Не знам како може да останете без енергија во осминафинале на Светско првенство, но така беше. Сега треба да чекаме уште четири години за нова шанса и тоа навистина боли. Кога ќе добиете црвен картон, нормално е да очекувате дека ќе го пропуштите следниот натпревар. Ако таа одлука се промени, сосема е нормално да има контроверзии. Но јас сум фудбалер и моја работа е да излезам на теренот и да се концентрирам на играта. Најмногу ме боли поразот. Само ги почитував одлуките на ФИФА. Не ги знаев деталите, ниту бев вклучен во целиот процес“, изјави Балогун.
Целата ситуација околу Балогун веројатно негативно се одрази на репрезентацијата на САД.
