• Саше Љолес
ФИФА го суспендираше белградскиот клуб Партизан и му забрани да регистрира нови играчи во следните три преодни рокови. Ова значи дека „црно-белите“ нема да можат да доведуваат никакви засилувања до летото 2027 година.
Причината за суспензијата е неплатена обврска кон поранешниот играч Патрик Андраде, за која Партизан загуби спор пред Судот за спортска арбитража. Износот на долгот е околу 270.000 евра, плус трошоци.
Казната од ФИФА важи само за регистрација на играчи, но клубот може да ја отстрани суспензијата доколку ги исплати долговите кон засегнатиот играч.
Оваа забрана нема автоматски да влијае на натпреварите кои клубот веќе ги има планирано, но ќе ги ограничи можностите за засилување на тимот во следните сезони. Доколку Партизан не пронајде начин за брза исплата на долгот, се соочува и со подрастична парична казна, која може да изнесува дополнителни 500.000 евра.
