• Иван Димовски
Холандскиот „Класикер“ заврши со убедлива победа на Феенорд на гости кај Ајакс од 0-4 (0-3). Дуелот од шестото коло кој викендов беше прекинат поради хаосот кој го предизвикаа домашните фанови, се доигра пред празните трибини на „Јохај Кројф Арена“.
В неделата Феенорд дојде до предност од три гола во првиот дел преку Сантијаго Хименез и Игор Паишао. Сепак, во 55. минута најверните навивачи на Ајакс го прекинаа мечот со пиротехника.
Денес се доигра дуелот во Амстердам, пред празните трибини, а Феенорд дојде до уште поубедлива победа. На самиот почеток, поточно во 59. минута Хименез го комплетира хет-трикот и донесе голем триумф над великанот.
Со овој триумф Феенорд е на четвртото место со четири бода помалку од водечкиот ПСВ и по еден од АЗ и Твенте. Од друга страна, Ајакс е во катастрофална серија и има само пет бода на 14. место.
