• Мартин Танасковски
Фудбалските кариери не секогаш одат по посакуваниот пат. На своја кожа тоа го почувствува Мохамед Ихатарен кој пред три години важеше за европски мега-талент, но сега едвај најде нов клуб.
Пред три години Ихатарен се пресели од ПСВ Ајднховен во Јувентус за 12 милиони евра како еден од најголемите европски таленти. Тогаш имаше 19 години. Сепак, по пристигнувањето во Торино, неговата кариера тргна надолу. Имаше многу проблеми надвор од теренот, неговата дисциплина беше далеку од идеална, а тоа се одрази и на неговите игри.
Ихатарен не се снајде во Јувентус, отиде на позајмица во Сампдорија, каде што исто така собираше минути за малку, а потоа во јули 2023 година потпиша за турски Самсунспор. Веќе во август истата година го напушти турскиот клуб.
Играчот беше без ангажман четири месеци пред да замине во Славија Прага во декември 2023 година, но ниту тоа не беше добар потег. Не ја задоволи Славија на тренинзите, па го испратија во чешкиот второлигаш во Славија Б, вториот тим на прашкиот гигант. Во Прага остана до јуни 2024 година, кога ја напушти Чешка и повторно дојде периодот без клуб.
Тогаш Ихатарен беше во многу лош период, а некои медиуми пишуваат дека тој дури молел разни клубови да му дадат договор само за да тренира, но сите го одбиле, особено клубовите од Холандија. Сепак, сламката за спасот дојде при крајот на септември, кога тој официјално стана член на РКЦ Ваалвајк, тим кој се натпреварува во Ередвизие.
Овој 22-годишен фудбалер потпиша договор со клубот до 2025 година и се надева дека ќе ја врати старата форма.
