• Мартин Танасковски
Нов скандал го тресе турскиот фудбал, откако потпретседателот на Галатасарај, Маруф Гунеш, беше уапсен во рамки на истрага за наводно нелегално обложување и местење натпревари.
Според информациите што ги објавија турските медиуми, Гунеш е осомничен дека уплатил пет милиони евра на облог дека голманот Фернандо Муслера ќе постигне гол на натпреварот против Кајсериспор, одигран на 18 мај 2025 година. Наводно, станувало збор за коефициент 130, а истражителите проверуваат дали досудениот пенал на тој натпревар бил дел од однапред договорено сценарио.
Истрагата, според локалните медиуми, била отворена откако биле забележани невообичаено високи уплати на истиот тип облог непосредно пред натпреварот. Дополнително внимание предизвикало тоа што меѓу лицата поврзани со тие уплати се споменува и потпретседателот на Галатасарај.
Во рамки на истрагата се проверува и улогата на легендарниот уругвајски голман Фернандо Муслера, кој засега не е јавно обвинет за какво било кривично дело. Преку своите адвокати, Муслера соопштил дека официјален исказ ќе даде исклучиво пред надлежните институции, а не преку медиумите.
Случајот предизвика големо внимание во Турција, особено затоа што Муслера важи за една од најголемите легенди во Галатасарај. Тој мина 14 години во клубот, одигра 551 натпревар и постигна два гола, а пеналот против Кајсериспор го изведе на својот проштален настап во дресот на истанбулскиот гигант во 89. минута.
Турските фудбалски власти внимателно ја следат истрагата, а медиумите шпекулираат дека, доколку се докажат неправилности, би можеле да следуваат сериозни дисциплински мерки. Засега, сепак, нема официјални одлуки, а постапката е во тек.
