• Саше Љолес
Селекторот на хрватската репрезентација, Златко Далиќ, не го криеше задоволството по пласманот на „коцкестите“ на Европското првенство, но исто така рече дека мисијата не била воопшто лесна.
Далиќ е свесен дека неговиот тим минал низ тежок период, но е среќен што Хрватите избориле пласман и очекува масовна поддршка од навивачите следното лето на турнирот во Германија.
„Исцрпени сме, но освоивме шест бода и успеавме да ја оствариме целта. Се пласиравме на Европското првенство, а таму очекувам огромна поддршка од нашите фанови. Покажавме карактер во моментите кога многу играчи не се во добра форма. Мислам дека публиката тоа го препозна и затоа сите сплотени мора да отпатуваме во Германија. Не знам во кој шешир сме и немам никакви посебни желби.
Секое Европско првенство е многу тешкко и затоа не се оптоварувам со нашите противници. Првата цел секогаш е да ја минеме групата, а потоа ќе видиме што ќе се случи. Мораме да бидеме на највисоко ниво ако сакаме да го повториме успехот од Русија и Катар. Ќе биде многу тешко, нам полесно ни е да играме Светски отколку Европски првенства, но ќе се бориме до крај“, изјави Далиќ.
Хрватската репрезентација е единствена од поранешните ју-простори која од осамостојувањето досега, пропушти само еден континентален собир. Последниве години „коцкестите“ бележа неверојатни успеси на Мундијалите во Русија и Катар, каде се закитија со сребрениот и бронзениот медал, па навивачите сигурно ќе очекуваат одличен пласман и на Европското првенство во Германија.
