• Саше Љолес
Медиумите кај северниот сосед пишуват дека раководството на Црвена Звезда одбило богата понуда од 20 милиони евра за еден од своите најталентирани млади фудбалери, Василије Костов.
17-годишниот играч со македонско потекло, кој сезонава се истакна со одлични настапи, голови и асистенции, веќе го привлече вниманието на европските гиганти, но јасно е дека белграѓани нема лесно да се откажат од неговите услуги. Според информациите, Звезда одбила понуда од лондонски Арсенал, а во трка за потписот на Костов се споменуваат и италијанските гиганти - Интер и Милан.
Интерес за младиот фудбалер покажале и европски гиганти како Јувентус и Баерн Минхен, но тие не доставиле конкретна понуда до српскиот суперлигаш. Во клубот веруваат дека Костов е вистински фудбалски бисер, што значи дека очекуваат неговата цена драстично да порасне во следниот период.
Некои одат и дотаму што велат дека токму „Македонецот“ може да го постави српскиот рекорд кога се работи за трансфери, надминувајќи ја фамозната сума од 50 милиони евра. Костов е под договор со Црвена Звезда до истекот на сезоната 2027/28.
