• Мартин Танасковски
Капитенот на Манчестер Јунајтед, Бруно Фернандеш, би можел да го напушти „Олд Трафорд“ на крајот на сезоната, откако според повеќе извори од Англија, клубот постигнал усмен договор со Ал Хилал за негов трансфер во Саудиска Арабија. Саудискиот гигант е подготвен да плати околу 115 милиони евра за португалскиот плејмејкер, што би претставувало еден од најскапите трансфери во историјата на клубот.
Истиот клуб веќе минатото лето се обидуваше да го доведе Фернандеш со идентична понуда, но тогаш Манчестер јунајтед ја одби иницијативата, а Португалецот јавно изјави дека ќе остане доколку клубот смета дека неговото присуство е и понатаму неопходно.
Фернандеш има важечки договор до 2027 година, но со оглед на скромниот почеток на новата сезона и лошата форма на целиот тим, прашањето за неговата иднина повторно се актуализира. Според медиумите, Ал Хилал има нова офанзива уште во јануарскиот преоден рок, со тоа што фудбалерот би добил неделна плата од околу 800.000 евра нето – што е скоро двојно повеќе од актуелните примања во Англија.
Фернандеш сезонава има постигнато само два гола на осум натпревари, без ниту една асистенција, што е значително под неговите стандарди. Од неговото пристигнување во Јунајтед во јануари 2020 година, Португалецот одигра речиси 300 натпревари, постигна 100 погодоци и запиша 86 асистенции, што го прави еден од најпродуктивните играчи на клубот во последната деценија.
Доколку трансферот се реализира, Манчестер јунајтед би добил значаен финансиски импулс во обидот да го реконструира тимот. Според најавите, дел од средствата би биле насочени кон ангажман на двајца млади играчи, тоа се 21-годишниот Карлос Балеба од Брајтон и 22-годишниот Елиот Андерсон од Нотингем Форест.
