• Зоран Мишевски
Се враќа англискиот фудбал! Паузата заврши и време е за битка за првиот трофеј на Островот, каде што во Комјунити шилд ќе се сретнат актуелниот шампион на Англија Арсенал и освојувачот на ФА Купот Манчестер Сити. Често се зборува дека овој трофеј не е баш толку важен, некои дури и не го сметаат меѓу најзначајните за вкупниот број освоени пехари, но натпреварување е натпреварување и трофеј е трофеј. Затоа ќе биде интересно да се види каков е односот на силите меѓу двата најдобри англиски клуба во последните две години (недела, 16:00 часот).
Топчиите од северен Лондон ја симнаа клетвата долга повеќе од две децении и конечно ја освоија Премиер лигата во одлична сезона, во која играа и финале на Лигата на шампионите. Манчестер Сити освои два купа – ФА Куп и Лига куп, па не може да се каже дека имаа неуспешна сезона, иако според нивните стандарди, кои ги поставија низ годините, не беше баш некој спектакл од сезона.
Многу работи се променија и кај нив, бидејќи почнува нова ера без Пеп Гвардиола. Каталонскиот стручњак си замина по најуспешниот период во историјата на клубот, во кој со него освоија сѐ што можеа да освојат, па сега Енцо Мареска има задача да продолжи по патеката што ја трасираше еден од неговите учители и наследник кого веројатно и самиот Пеп им го препорачал на челниците на клубот.
Што се однесува до Арсенал, немаа некој ветувачки подготвителен период, бидејќи загубија на два натпревари, еден ремизираа и запишаа една победа, иако не беа ниту целосно комплетни за време на тие пријателски натпревари. Дебитираше Бруно Гимараеш како најголемо засилување ова лето и треба да се очекува во стартниот состав против Манчестер Сити, но не треба да се очекува дека ќе настапат најсилните состави на овој натпревар.
Тренерите често знаат да ги измешаат картите во Комјунити шилд и да им дадат шанса на играчи кои минатата сезона немале голема минутажа или не се баш во големите планови за претстојната, па треба да се биде внимателен и во анализата и во прогнозата за првиот натпревар од елитниот ранг на англискиот фудбал.
Минатата сезона Кристал Палас го освои ова натпреварување кога по изведување пенали го совлада Ливерпул на Вембли, додека сега Енцо Мареска ќе има можност на својот прв официјален натпревар да освои трофеј – или Артета да додаде уште еден Комјунити шилд во својата витрина.
