• Саше Љолес
Тренерот на турскиот гигант Бешикташ, Шенол Ѓунеш, се најде во центарот на вниманието откако утрово изјави дека англискиот фудбалер Деле Али не се појавил на тренингот и „не знаел каде се наоѓа“, а не одговарал и на неговите повици.
Започнала неколкучасовна панична потрага по 26-годишниот Деле Али, а тој се огласи на својот Инстаграм профил и ја објасни целата ситуација. Фудбалерот напиша дека клубот му дозволил неколкудневен одмор и тој го искористил времето за дополнителни лекарски прегледи.
„Добив пораки од многу луѓе и би сакал да ја појаснам ситуацијата. Не сум „исчезнат“, клубот ми даде дозвола да одам на лекарски прегледи, а јас утре се враќам во тренажен процес и ќе бидам повторно на располагање на стручниот штаб“, стои во кратката објава од Англичанецот.
Пред само неколку денови беше објавено дека тој е суспендиран од тимот, но сепак изгледа дека тренерот Ѓунеш се предомислил и сака да го врати играчот во екипата. Деле Али беше доведен како огромно засилување за Бешикташ и рака на срце, солидно ја започна сезоната, но потоа следуваше голем пад во формата и многумина беа разочарани од неговиот перформанс.
Тој уште е многу млад и има време да ја крене својата форма. Беше неверојатен во дресот на Тотенхем кај тренерот Маурицио Почетино, но потоа неговата кариера доживеа вртоглав пад и сега се труди со сите сили да се врати во старата, препознатлива форма, а тогаш беше еден од најдобрите офанзивни фудбалери во Англија.
