• Мартин Танасковски
Младата ѕвезда на Барселона, Ламин Јамал, нема да биде на располагање за натпреварот од Лигата на шампионите против Њукасл. Шпанскиот медиум „Мундо Депортиво“ потврди дека талентираниот офанзивец се соочува со повреда во пределот на пубичната коска, која му создава проблеми веќе подолг период.
Јамал не беше дел од тимот и за време на убедливата победа од 6-0 над Валенсија во шпанското првенство, а причината е истата здравствена состојба. Се наведува дека болките првпат се појавиле на 23 август, во победата од 3-2 против Леванте. Подоцна ситуацијата дополнително се влошила при ремито 1-1 со Рајо Валекано.
Иако младиот фудбалер се појави во дресот на шпанската репрезентација и придонесе во убедливите триумфи против Бугарија (3-0) и Турција (6-0), токму тие настапи се сметаат за фактор што ја заострил повредата.
Сега, стручниот штаб на Барселона одлучи да му даде време за одмор и целосно заздравување, со цел да се избегне ризик од поголеми компликации. Талентот на Јамал е од огромно значење за тимот, па клубот не сака да ризикува со негово прерано враќање.
Иако Барселона располага со доволно офанзивни опции, отсуството на Јамал ќе биде голем удар, особено со оглед на неговата форма и влијание врз играта од почетокот на сезоната.
