• Мартин Танасковски
Шпанскиот фудбалски првак Барселона продолжува со добрите настапи во подготвителниот период, откако на пријателски натпревар го совлада Базел со убедливи 5-2.
- Извештај од натпреварот:
Актуелниот шпански шампион до предност стигна во 34. минута преку летното засилување Карим Адејеми. Германскиот крилен напаѓач одлично се снајде во противничкиот шеснаесетник и со прецизен удар ја затресе мрежата за 1-0. Сепак, Базел успеа да возврати пред паузата и во 43. минута го израмни резултатот, па на одмор се замина со 1-1.
На стартот од второто полувреме, тренерот Ханси Флик направи неколку измени, а една од нив веднаш донесе резултат. Само три минути по продолжението, Хамза Абделкарим погоди за ново водство на Каталонците и 2-1. Барселона долго време ја одржуваше минималната предност, а највозбудливиот дел од натпреварот следуваше во завршните десет минути. Во 81. минута Ламин Јамал зголеми на 3-1, пред Казим Олаигбе да намали на 3-2 и да внесе неизвесност.
Сепак, каталонскиот гигант не дозволи изненадување. До крајот на средбата Џеси Бисиву двапати се запиша меѓу стрелците и го постави конечниот резултат - 5-2 во корист на Барселона.
