• Саше Љолес
Повеќе европски медиуми ја пренесуваат веста дека Баерн Минхен има огромна желба да го ангажира одличниот фудбалер на Баер Леверкузен, Флориан Вирц.
21-годишниот офанзивен играч за врска имаше прекрасна сезона со „фармацевтите“, ја освои титулата во Бундеслигата и придонесе со 18 голови и 18 асистенции, а тоа беше повеќе од доволен знак за европските гиганти да влезат во трката за неговиот потпис.
Тоа го потврдува и поранешниот претседател на Баерн, Ули Хенес, кој изјави дека Вирц е иднината на германскиот фудбал и Баварците мора да тргнат во офанзива за овој трансфер.
„Сите знаат дека би сакале да го видиме Вирц во Баерн. Тој би бил фантастично засилување и мислам дека со овој трансфер би завршиле одлична работа.
Во нашиот клуб ќе има идеални услови за уште поголем развој и во иднина би можел да биде најдобар играч во Германија. Очекувам клубот да ги употреби сите можни оружја за негово доведување“, рече Хенес.
Флориан Вирц во моментов е проценет на 130 милиони евра и се смета за вистински наследник на легендарниот Тони Крос. Тој е веќе пет сезони дел од Баер Леверкузен, но летово би можел да ја промени средината.
Прочитајте повеќе околу трансферите во Македонија и во светот на ОВОЈ линк.
