• Саше Љолес
Репрезентативецот Јани Атанасов го изрази својот оптимизам пред двата натпревари во Лигата на нации, во кои Македонија ќе треба да го потврди фаворитскиот статус и да го обезбеди првото место во четвртата група од Ц сегментот.
„Рисовите“ прво ќе се соочат со селекцијата на Летонија, за која Атанасов вели дека има квалитетен тим, но убеден е во реализација на нашиот план и најавува голема борба за трите бода.
„Собрани сме тука за да го потврдиме првото место во групата. Мотивирани сме и ќе дадеме максимум од нашите можности. Се надевам дека ќе ги освоиме трите бода и ќе ја израдуваме целата држава.
Нема да ја потцениме Летонија, имаат квалитетен тим кој ни зададе одредени проблеми на првиот натпревар. Ќе се бориме за овој дрес и ќе го оставиме срцето на терен. Мораме да ги исполниме задачите од селекторот, само така ќе можеме да го освоиме целиот плен“, изјави Атанасов.
Македонија и Летонија се среќаваат на 14 ноември во 20:45 часот, а три дена подоцна ја пречекуваме селекцијата на Фарските Острови во попладневниот термин од 15:00 часот.
