• Мартин Танасковски
Екипата на Арсенал и покрај сите проблеми дојде до победа на гостувањето кај Тотенхем (0-1) и така остана веднаш зад лидерот на табелата Манчестер Сити во рамки на Премиер лигата.
- Извештај од натпреварот:
„Топџиите“ имаа еден тон проблеми пред оваа средба, но излегоа како посилни и ги освоија трите бода кај големиот градски ривал. На овој натпревар Арсенал беше без новите засилувања Калафиори и Мерино кои се повредени, а исто така не играа и Одегард, Рајс, Тирни и Томијасу.
Доста агресивен беше првиот дел во дербито за северен Лондон, затоа што судијата Жилет имаше доста работа. Подели дури седум жолти картони, пет за домашните, уште два за гостите. Околу шансите, Тотенхем тргна со можност на Кулушевски, но го запре Раја, а на спротивната страна обид имаше Хаверц ама не погоди.
Имаше и еден спорен момент во 19. минута кога Арсенал бараше пенал заради игра со рака на Кристијан Габриел Ромеро, но судиите и ВАР-собата не реагираа. Вториот дел почна мирно, се до таа 64. минута кога Арсенал дојде до предност. Букајо Сака имаше центаршут, кој во гол го претвори Габриел кој беше највисок во скокот.
Во продолжението од натпреварот Анѓе Постекоглу се обиде да го промени текот на дуелот со измени, но немаше реализација. Најблиску до гол беше Кулушевски пред самиот финиш, топката профуче над пречката.
