• Мартин Танасковски
Женската фудбалска репрезентација на Македонија ја оствари втората победа во квалификациите за Светското првенство (СП). Пред нашиот национален тим падна Летонија (3-2), а играч на натпреварот беше Наташа Андонова.
Нашата најдобра фудбалерка и капитен во репрезентацијата даде два гола и имаше една асистенција. Истакна дека е среќна поради тоа, но најважно е што Македонија успеала во првата цел, тоа е да освои шест бода со директниот конкурент во групата за избегнување на последната позиција и да се направи напредок во резултатите.
„Нашата цел ја остваривме, целта ни беше да не бидеме последни во групата, а потоа и да освоиме од девет до дванаесет бода. Успеавме двапати да ја победиме Летонија. Атмосферата е супер, некои девојки се вратија во националниот тим, како на пример Ленче Андреевска и тоа доста помогна. Максимално се изборивме за победа дома и сум среќна што успеав да помогнам со два гола и асистенција. Го дадов макимумот и чест ми е да го носам македонскиот дрес, тоа за мене е нешто свето и засекогаш ќе биде така. Следен натпревар ни е против Австрија, еден од фаворитите во групата. Ќе се потрудиме да парираме и да се покажеме во што е можно подобро светло“, изјави Андонова.
Нашиот национален тим предводен од селекторот Кирил Изов следниот натпревар го игра во вторник против Австријките. Првиот меѓусебен натпревар во Скопје заврши со резултат 0-6.
