• Саше Љолес
Новата сезона во италијанската Серија А е сè поблиску, а поранешниот тренер на Јувентус и Милан, Фабио Капело, даде интересна анализа за состојбата во двата гиганти. Во својата колумна за „Газета дело Спорт“, искусниот стратег посочи што според него мора да се поправи во Јувентус и Милан, а воедно го откри и својот фаворит за освојување на шампионската титула.
Кога станува збор за Јувентус, Капело смета дека најголемата дилема во моментов е голманската позиција. Иако Микеле Ди Грегорио е дел од тимот, поранешниот тренер на „Старата дама“ не верува дека тој е идеалното долгорочно решение.
Во последниот период со Јувентус се поврзуваат Зион Сузуки од Парма и Гуљелмо Викарио од Тотенхем, а Капело јасно стави до знаење кого би го избрал доколку клубот се одлучи за привремено решение.
„Јувентус сè уште има голем проблем, а тоа е голманот. Го велам тоа со должна почит кон Микеле Ди Грегорио, но неговата ситуација ми изгледа неповратно. Се споменуваат многу имиња и според она што го видов, Јувентус би можел да претпочита привремена опција, одложувајќи го големото трошење за следното лето. Ако новиот голман дојде на позајмица, немам дилема на кого би се обложил - на Викарио од Тотенхем“, изјави Капело.
Според него, италијанскиот голман има предност пред Сузуки затоа што веќе има искуство во голем клуб и покажал дека може да се справи со притисокот на највисоко ниво.
Капело, сепак, има уште повеќе забелешки за Милан. Тој смета дека „росонерите“ сè уште не се целосно оформен тим и дека постојат неколку ситуации кои мора да бидат решени пред почетокот на сезоната.
„Милан сè уште чека две големи имиња, Мањан и Рабио. Воопшто не ми се допадна веста дека нивното враќање од одмор е одложено за четири дена. Ниту новите засилувања Гила и Рамос не ги видовме многу, а не е јасно ниту која стартна постава ја има замислено Аморим“, смета Капело.
Италијанецот посебно се осврна на ситуацијата со Рафаел Леао, околу кого во последниот период имаше многу шпекулации за можна преселба во Премиер лигата.
„Имам чувство дека во Милан сè уште постои одредена конфузија, почнувајќи од ситуацијата со Рафаел Леао. Рафа се прецени со тоа што јавно зборуваше за Премиер лигата. Ако остане, би бил внимателен на реакцијата на „Сан Сиро“ уште првиот пат кога нема да успее да се истакне“, додаде Капело.
Поранешниот тренер на двата клуба смета дека Милан мора да има појасна стратегија и да се врати кон создавање силно италијанско јадро. Тој се надева дека младите Франческо Камарда, Кристијан Комото, Давиде Бартесаги и Лоренцо Торијани ќе останат во првиот тим и ќе добијат вистинска шанса.
Капело очекува и дополнителни активности на трансфер-пазарот во завршницата од преодниот рок, а верува дека следните разговори меѓу раководството и тренерот ќе помогнат да се расчистат дилемите.
На крајот, Капело откри и кој според него во моментов е најблиску до освојување на шампионската титула. Неговиот фаворит е Интер, за кој смета дека има значителна предност во однос на најголемите конкуренти.
Според искусниот италијански стратег, Јувентус и Милан имаат квалитет да се борат за врвот, но пред почетокот на сезоната сè уште имаат неколку важни прашања за решавање.
