• Мартин Танасковски
Италијанскиот гигант Милан официјално го потврди трансферот на португалскиот напаѓач Гонсало Рамош, кој пристигнува од Пари Сен Жермен. Дваесет и петгодишниот репрезентативец на Португалија стави потпис на петгодишен договор и ќе биде еден од клучните адути на „росонерите“ во наредните сезони.
Според информациите од италијанските медиуми, Милан за неговите услуги ќе плати 74 милиони евра, плус дополнителни бонуси, што го прави најскапиот трансфер во историјата на клубот. Досегашниот рекорд го држеше Рафаел Леао, чиј вкупен трансфер, заедно со подоцнежната компензација исплатена на Спортинг Лисабон, достигна околу 50 милиони евра.
Воедно, ангажманот на Рамош е и највредниот трансфер во италијанската Серија А од 2019 година, кога Интер издвои иста сума од 74 милиони евра за доведување на Ромелу Лукаку од Манчестер Јунајтед.
Португалскиот голгетер е првото засилување на Милан откако тренерската функција ја презеде неговиот сонародник Рубен Аморим, кој ќе се обиде да изгради нов конкурентен тим за борба за највисоките цели.
Рамош во Пари Сен Жермен пристигна во 2023 година како позајмен фудбалер од Бенфика, а една година подоцна францускиот шампион го откупи неговиот договор за 65 милиони евра. За време на престојот во Париз освои вкупно 12 трофеи, меѓу кои две титули во Лигата на шампионите и три шампионски круни во француската Лига 1.
Во дресот на Пари Сен Жермен одигра 131 натпревар, постигна 45 голови и запиша 10 асистенции, а во Милан пристигнува со очекувања да биде нов лидер на нападот и еден од главните носители на играта во наредните години.
