• Горан Упале
За првпат во три држави следната година ќе се одржи Светското првенство во фудбал. Домаќини на шампионатот на кој за првпат ќе учествуваат 48 селекции ќе бидат Соединетите Американски Држави, Канада и Мексико.
Според „ЕСПН“, ждрепката за Светското првенство ќе се одржи на петти декември во Лас Вегас. Интересно е што Вегас беше домаќин на ждрепката во 1994 година, кога Соединетите Американски Држави самостојно го организираа Светското првенство.
Ова Светско првенство ќе има 12 групи, а веќе е познато дека Мексико ќе биде во групата А, Канада ќе игра во групата Б, а Соединетите Американски Држави ќе бидат во групата Д.
Натпреварите на претстојното Светско првенство ќе се играат во 11 градови во Соединетите Американски Држави, три градови во Мексико и два во Канада. Финалето ќе се игра на стадионот „МетЛајф“ во Њу Џерси.
