• Мартин Танасковски
Во дербито на шестото коло од холандската Ередивизија, ПСВ и Ајакс одиграа возбудливо реми (2-2) во Ајндховен, во натпревар во кој актуелниот шампион двапати имаше предност, но не успеа да го задржи до крај.
- Извештај од натпреварот:
Домаќините рано го отворија резултатот – во седмата минута Исмаел Саибари ја затресе мрежата на Ајакс по прецизен центаршут на Иван Перишиќ, кој уште еднаш покажа колку значи неговото искуство на левата страна. ПСВ доминираше во првите минути, но гостите успеаја да се вратат. Во 31. минута Кенет Тејлор од белата точка израмни на 1-1, откако судијата досуди пенал по прекршок во шеснаесетникот.
Следуваше мирен период на натпреварот, во кој двата тима повеќе внимаваа на дефанзивата отколку на ризик во нападот. Но, вистинската драма почна во финишот. Во 81. минута летното засилување на ПСВ, поранешниот стопер на Валенсија Јарек Гасиоровски, со силен удар со глава донесе нова предност за тимот од Ајндховен. Навивачите веќе го гледаа како херој на натпреварот, особено затоа што станува збор за дефанзивец кој ретко се впишува меѓу стрелците.
Сепак, Ајакс не се предаде. Само осум минути подоцна, во 89. минута, младиот Израелец Оскар Глух со ладнокрвна завршница ја казни одбраната на ПСВ, откако одличниот Тејлор испрати совршено длабинско додавање. Со тоа Ајакс стигна до конечни 2-2 и заслужено однесе бод од тешко гостување.
Со овој резултат, ПСВ останува непоразен во новата сезона и задржува чекор со врвот на табелата, додека Ајакс со ремито покажа дека и покрај промените во составот и понатаму има квалитет да се носи со најголемите ривали.
ФОТО: AFC Ajax / X
