АЕЛ Лимасол и Здравковски го надиграа АПОЕЛ и го освоија Купот на Кипар

Фудбалерите на АЕЛ Лимасол му сервираа слатка одмазда на тимот на АПОЕЛ и го освоија Купот на Кипар.

Пред само четири дена двете екипи се сретнаа во првенствен натпревар, на кој шампионот славеше со убедливи 4-0, но вечерва Куп-трофејот заврши во рацете на АЕЛ кои со 0-2 го совладаа големиот фаворит. 

Резултатот беше отворен по само десет минути игра, кога бразилскиот офанзивец Жуниор ја затресе противничката мрежа, додека конечните 0-2 ги постави Адамовиќ во 66. минута. 

Македонскиот интернационалец Давор Здравковски започна од првата минута и беше еден од најдобрите поединци во таборот на АЕЛ Лимасол.