• Горан Упале
Хрватскиот шампион Динамо Загреб приреди сензација уште во воведното коло од новата сезона во Лигата на шампионите. „Модрите“ пред својата публика со миминални 1-0 го совладаа составот на Челзи.
Стрелец на единствениот погодок беше Оршиќ во 13. минута, а за играч на натпреварот беше прогласен нашиот репрезентативец Аријан Адеми. Капитенот на Динамо беше задоволен од одиграната партија на тимот и се надева на уште подобри резултати во иднина.
„Денес направивме навистина добри работи, одигравме квалитетен натпревар, победивме моќен противник и кога требаше да се браниме одлично се браневме. Секоја чест за играчите, тренерот и навивачите. Заслужена победа.
Договориот ни беше да му ја препуштиме топката на противникот. Игравме висок пресинг и добро е што ја искористивме нашата шанса. Се надевам дека ќе бидеме уште подобри на следните натпревари. Во фудбалот играш толку колку што противникот ќе ти дозволи. А Челзи денес одигра под ниво“, изјави Адеми.
Покрај Адеми, одличен натпревар против Челзи одигра и македонскиот репрезентативен капитен Стефан Ристовски, кој во вториот дел имаше супер-шанса за погодок.
