Македонскиот ракометен првак Еурофарм Пелистер на домашен терен го совлада големиот ривал Вардар 1961 (29-25) во второто лигашко дерби, меѓутоа нема промени на врвот затоа што пелистерци победија со четири, а вардарци го добија првото дерби со пет гола разлика. Голема е веројатноста до крајот Вардар да влезе со плус од три бода во битката за титула, а битолчани со плус од два, иако Еурофарм Пелистер во ова дерби водеше со девет гола и имаше напад за плус десет, ама Вардар го покажа оној стар добар карактер со кој двапати ја покори Европа. На крајот, кога мечот заврши со четири гола разлика, целата сала „Боро Чуревски“ ги награди вардарци со аплауз кои дојдоа до посакуваниот резултат иако дојдоа со проблеми поради вирус, а за пелистерци немаше многу добри зборови.
