Екипата на Еурофарм Пелистер го одбрани домашниот терен од големиот ривал Вардар 1961 (26-23) и со победата во еден спектакуларен натпревар со блескави моменти и на двете екипи зачекори кон титулата во домашниот шампионат. Битолчани 18 години, од 2005 година кога последен пат ја освоија двојната круна, беа во сенка на скопските тимови Вардар и Металург, но со овој триумф во „Боро Чурлевски“ се во пол-позиција и се имаат во своите раце. Ова беше осма домашна победа во осмиот меч на новиот тренерски тандем кај „зелените“ - Александар Јовиќ и Звонко Шундовски. До крајот на македонската ракометна Суперлига остануваат уште две кола.