Ништо ново во мак-баскетот. МЗТ Скопје е старо-нов првак на Македонија откако во третиот натпревар од финалната серија го победи Пелистер (83-92) во салата „Боро Чурлевски“ и така со максимални 3-0 го доби дуелот за титула. Пелистерци имаа контрола на играта едно полувреме, а потоа целиот концепт на тренерот Марјан Илиевски се распадна. Го покажа МЗТ Скопје своето искуство кое го стекна со играњето во регионалната АБА-лига, а исто така тука беше и индивидуалниот квалитет на Војдан Стојановски. Аеродромци така дојдоа до десеттата титула, а сите ги освоија во последните единаесет години. За битолчани, пак, ова е второ загубено финале во низа, баш од истиот ривал.
