Фотогалерија
Ракометарите знаат дека во репрезентативниот дрес е секогаш најубаво

Оптимизам и ведрина, сите ракометари здрави и мотивирани, изборот широк и главоболките поголеми од што има квалитет, а не од што нема. Во ваква клима македонските ракометари денес се собраа во Скопје на почетокот на подготовките за ЕП во Полска. Без разлика што недостига „тешката артилерија“ која и натаму треба да си ги заврши клупските обврски, сепак националната приврзаност можеше да се почувствува денес на првата средба на репрезентативците. Радува и младоста, многубројните ракометари кои имаат десетина настапи во дресот со државниот грб и треба да ја испишат нашата иднина во овој спорт. Од тоа како ќе се подготвиме многу работи зависат и како ќе минеме во Полска. Затоа сега почнува фазата која стручњаците ја сметаат за најчувствителна и најважна за остварување на успех на големите приредби.