Речено – сторено. Македонската ракометна репрезентација надополни шест гола негатива и ја совлада Чешка со 34-27. Од пред мечот во Злин знаевме дека сме поквалитетниот противник и дека треба да одиграме многу лошо за да не се квалификуваме на мундијалот во Франција. Но „машината“ започна да работи и за половина полувреме Чесите не знаеа што ги снајде. Стопена беше предноста и остварена нова, висока, недостижна. По 19-11 на полувреме „бајката“ продолжи во вториот дел, кога одолеавме на сите падови и ставен е печат на бараж приказната и на муабетите дека ова не е карактерна селекција. На Светско првенство не оди секој, па затоа овие момци и новиот стручен штаб заслужија да бидат дел од избраното друштво.
