Има 279 меча во ПЛ и евро-полуфинале, а сега ќе се проба во бокс рингот!

• Саше Љолес

Поранешниот велшки фудбалски репрезентативец Џејмс Колинс реши да направи голема промена во кариерата и да се испроба во боксот.

43-годишниот Велшанец, кој најголемиот дел од кариерата го помина во англискиот фудбал, ќе го има своето боксерско деби на претстојниот настан на „Misfits Boxing“ во Лондон. Колинс е најпознат по настапите за Вест Хем и Астон Вила, а професионалната кариера ја започна во Кардиф Сити.

Како цврст дефанзивец, тој одигра 279 натпревари во Премиер лигата, а од активното играње се повлече во 2019 година. Сега повторно ќе влезе во центарот на вниманието, но овојпат во рингот.

Неговиот противник ќе биде интернет-сензацијата Биг Стакс, кој се претставува како „најопасниот човек во Британија“. Стакс претходно овој месец го победи Џордан Мекен во неизвесен меч, откако влезе како замена за Томас Скинер, поранешна ѕвезда на телевизиското шоу „The Apprentice“.

Колинс за репрезентацијата на Велс одигра 51 натпревар и беше дел од историската генерација која стигна до полуфиналето на Европското првенство во 2016 година. Тој настапи и во полуфиналниот натпревар против Португалија, кој Велс го загуби.

Во клупската кариера, Колинс двапати играше големо англиско финале. Со Вест Хем во 2006 година стигна до финалето на ФА Купот, додека со Астон Вила четири години подоцна играше во финалето на Лига купот. И во двата случаи неговиот тим остана без трофеј.