Димовски: Горди сме на успехот на Аземи, боксот го враќаме на старите патеки

Боксерската федерација на Македонија го награди Ардијан Аземи со 120.000 денари по повод успехот на Европското првенство во Будва. Парична награда му е доделена и на тренерот Насер Харуни во висина од 60.000 денари.

Претседателот на Боксерската федерација на Македонија, Примислав Димовски по повод успехот во Будва рече:

„Драго ми е што имаме успех во боксот, по медалите во деведесетите години имавме голема пауза кога се успесите во прашање. По мојот медал во 1995 година, потоа на Чатлески, Гоергиески и Салиху, и оној историски во сениорска конкуренција на Вели Мумин, имаме прв медал од младинско Европско првенство.

Горди сме на овој успех среќни и радосни, ова е не само наш успех во федерацијата, ова е значаен момент за спортот во Македонија во моменти кога живееме во услови на пандемија. Ги наградивме Ардијан Аземи и Насер Харуни парично, медалистот Аземи со 120.000 денари, тренерот со 60.000 денари. Сакам да истакнам дека покрај нив на Европското првенство во Будва настапија и браќата Илхан и Ајхан Озмен и тренерот Васко Цубалевски. Благодарни сме за тоа што го направија за промоција на македонскиот бокс. Сакам да упатам посебна благодарност и до Алкалоид и господинот Живко Мукаетов кои го реализираа нашиот ваучер во услови на пандемија и го помогнаа боксот кога беше најпотребно“, изјави Димовски на прес-конференцијата.

За Македонија ова е прв медал во младинска конкуренција по 1995 година, по успехот на Примислав Димовски во Турција.