• Иван Димовски
Невремето сериозно се заканува да ја наруши трката за Големата награда на Мајами во Формула 1, откако прогнозите најавуваат голема веројатност за дожд и грмежи во текот на неделата. Според информациите, за денот на трката постои 88% шанса за врнежи, како и 53% веројатност за грмежи, што претставува најголем проблем за организаторите и тимовите.
Причината е јасна, според американските безбедносни правила, секој голем спортски настан на отворено мора да биде прекинат доколку постои ризик од гром. Во таков случај, медицинскиот хеликоптер не смее да полета, а присуството на публика се смета за небезбедно. Тоа значи дека дури и без поплавена патека, трката може да биде стопирана со црвено знаме, а болидите повлечени во бокс.
Дополнително, за трките во Мајами, Остин и Лас Вегас важи посебно правило. Во случај на прекин поради невреме, тимовите имаат дозвола да ги внесат болидите во гаража и да работат на нив, наместо да останат во пит-лејн на отворено.
Според регулативата на ФИА, прекинот се спроведува согласно член 57 од спортскиот правилник. Болидите се враќаат во боксовите, а потоа добиваат инструкции да бидат внесени во гаражите.