• Саше Љолес
Актуелниот светски шампион во рели, Себастиен Ожие, имаше драматичен инцидент на трката во Финска, откако излета од патеката за време на претпоследниот брзински тренинг. Французинот во тој момент беше лидер во генералниот пласман и беше на добар пат кон уште една победа.
При голема брзина неговата Тојота неколкупати се преврте, а болидот претрпе огромни оштетувања. И покрај тешката несреќа, Ожие и неговиот совозач Жилиен Инграсија успеаја самостојно да излезат од возилото.
Од претпазливост, двајцата беа префрлени со хеликоптер во болница, каде што им беа направени детални медицински прегледи.
Заменик-шефот на тимот на Тојота, Јуха Канкунен, потврди дека ниту Ожие ниту Инграсија немаат сериозни повреди. Набргу потоа се огласи и самиот француски возач, кој им се заблагодари на сите за поддршката и откри дека кратко ќе остане во болница, само од превентивни причини.
„Најважно е што и двајцата сме добро. Секако, ова не е исходот што го посакувавме, особено по одличниот почеток на викендот. Му благодарам на целиот тим на Тојота што произведува толку безбедни и издржливи автомобили, како и на Жилиен, кој веднаш го извести моето семејство дека сè е во ред.
Сега ни претстои одмор и закрепнување за што поскоро да се вратиме на патеките. Благодарам на сите за пораките и огромната поддршка“, изјави Ожие.
До моментот на несреќата, Французинот имаше целосна контрола врз релито, но неговиот настап беше прекинат поради инцидентот. Причината за излетувањето сè уште не е позната, а ќе биде утврдена по деталната анализа што ќе ја спроведе тимот на Тојота.