• Мартин Танасковски
Седумкратниот светски шампион и возач на Ферари, Луис Хамилтон, најави дека во својата 20. сезона во Формула 1 ќе настапи без задршка, со иста страст и решителност како на почетокот од кариерата и верува дека со новиот болид Ферари може да дојде до титулата. Британецот истакна дека и понатаму стои цврсто на своите позиции, мотивиран и целосно насочен кон исполнување на сопствениот сон.
Хамилтон се подготвува за стартот на новата сезона, која традиционално започнува со трката во Мелбурн. Според неговите изјави, се чувствува освежено и подготвено пред втората година во болидот на Ферари, со јасна намера да го надмине разочарувањето од претходната сезона. Минатата година беше особено тешка за него, бидејќи за првпат во својата богата кариера не успеа да обезбеди пласман на победничкиот подиум.
Британскиот ас дели рекорд од седум шампионски титули со легендарниот Михаел Шумахер. Покрај тоа, тој е статистички најуспешниот возач во историјата на Формула 1, со 105 победи и 104 освоени пол-позиции, достигнувања што го поставуваат на врвот на листата по број на триумфи и стартни позиции од првото место.
Новата сезона во Формула 1 започнува со трката за Големата награда на Австралија, која ќе се одржи во недела наутро во Мелбурн. За Хамилтон, ова ќе биде нова можност да покаже дека и по две децении на врвно ниво, амбицијата и желбата за успех не избледуваат.