• Мартин Танасковски
Организаторите на МотоГП донесоа значајна одлука која ќе стапи на сила од сезоната 2027, а тоа е целосна забрана на настапите со т.н. „вајлд-кард“ во кралската класа.
Одлуката е донесена од Гран при комисијата, составена од претставници на ФИМ, тимовите, производителите и самата организација со цел да се воспостави порамноправен и поконзистентен натпреварувачки систем.
Со оваа промена, производителите повеќе нема да можат да користат дополнителни мотоцикли и тест-возачи за развојни цели во поединечни трки. Наместо тоа, сите технолошки новини ќе мора директно да дебитираат преку официјалните возачи во шампионатот.
До крајот на тековната сезона, „вајлд-кард“ настапите ќе останат дозволени за производителите кои имаат право на нив, но со важно ограничување. Тие нема да смеат да ги користат новите 850-кубни мотори, предвидени за сезоната 2027, во трките што ќе се одржат во 2026 година.