• Мартин Танасковски
Возачот на Априлија, Хорхе Мартин, стигна до победа на спринт-трката за Големата награда на Австрија во Мото ГП шампионатот, по драматична трка на патеката „Ред Бул Ринг“.
Шпанецот тргна од пол-позицијата, но уште во првиот круг беше оттурнат надвор од патеката од Марк Маркез и падна на седмата позиција. Настанатиот хаос на стартот најдобро го искористи Педро Акоста, кој веднаш го презеде водството и долго време изгледаше како сигурен победник.
Сепак, три круга пред крајот следуваше пресврт. Акоста доживеа пад додека беше во водство, а тоа му овозможи на Мартин, кој во меѓувреме со одлично возење се проби до второто место, да ја преземе лидерската позиција и прв да мине низ целта.
Второто место му припадна на Марк Маркез, додека на третата позиција заврши Марко Бецеки.
Со овој триумф Мартин повторно се искачи на врвот во генералниот пласман и сега има предност од три бода пред Марк Маркез.
До бодови во спринтот стигнаа и Аи Огура, Алекс Маркез, Франческо Бањаја, Жоан Зарко, Фермин Алдегер и Бред Биндер.
Главната трка за Големата награда на Австрија на патеката „Ред Бул Ринг“ ќе се вози во недела со почеток од 14:00 часот.