• Мартин Танасковски
Четирикратниот светски шампион Макс Верстапен отворено проговори за својата иднина во Формула 1, по разочарувачкиот настап на трката за Големата награда на Јапонија, каде што заврши на осмото место.
Возачот на Ред Бул истакна дека сè почесто размислува за продолжување на кариерата, потенцирајќи дека повеќе не ужива во тркањето по воведувањето на новите правила и мотори за сезоната 2026. Според него, промените значително го измениле начинот на возење и ја нарушиле природната динамика на спортот.
„Не е проблем да се биде седми или осми. Проблемот е кога не уживате во начинот на кој треба да возите. Тоа не е природно за еден возач и оди спротивно на суштината на тркањето“, изјави Верстапен.
Холандскиот ас објасни дека новиот технички концепт бара постојано управување со енергијата и полнење на батеријата, што доведува до нерамномерни перформанси и чести промени во позициите на патеката. Токму ваквиот стил на возење, според него, ја намалува возачката автентичност и задоволството. И покрај доминацијата во периодот од 2021 до 2024 година, Верстапен има тежок старт на актуелната сезона, без ниту едно искачување на подиум по првите три трки. Тој нагласи дека финансискиот аспект повеќе не игра улога во неговите одлуки, туку клучно е чувството на задоволство зад воланот.
„Ова отсекогаш била моја страст. Сакам да уживам во тоа што го правам, а во моментов тоа го нема“, додаде тој.
Како можна насока за иднината, Верстапен ги гледа трките на издржливост, вклучително и настап на легендарната 24 часа Нирбургринг, како и развој на сопствен ГТ3 проект, што дополнително ги подгрева шпекулациите за евентуално повлекување од Формула 1 во наредните години.