Хаас му „прости“ на Мазепин, Русинот ќе вози со Шумахер во 2021!

Никита Мазепин успеа да направи скандал уште пред да дојде во Формула 1, откако објави експлицитно видео на кое се гледа како допира девојка и ја снима. Тој беше веднаш осуден за оваа постапка и се шпекулираше дека можеби ќе добие отказ во Хаас. 

Сепак, овој тим го потврди Мазепин заедно со Мик Шумахер ќе вози во гридот за сезоната 2021 во најбрзото авто-мото шоу. 

„Хаас Формула 1 тимот потврдува дека Никита Мазепин и Мик Шумахер ќе ја формираат возачката постава за светското првенство на ФИА Формула 1 за 2021 година. Според претходните изјави на тимот во врска на постапките на Никита Мазепин, ова прашање е решено интерно и повеќе нема да има понатамошни коментари“, напишаа од Хаас. 

Мазепин ќе дебитира во Формула 1 на стартот на новата сезона, но сепак се очекува да биде во втор план бидејќи неговиот тимски колега Мик Шумахер веќе ги собира погледите од медиумите поради својот татко Михаел. Едно е сигурно Хаас ќе добие популарност, а можеби и спонзори за наредните сезони во Формула 1, па можеби и ќе направат конкурентен болид.