• Мартин Танасковски
Формула 1 од сезоната 2027 ќе воведе пократки трки, откако беше одлучено максималната должина на Гран при трките да се намали од досегашните 305 на 290 километри. Промената е директно поврзана со новите технички правила и изменетиот однос меѓу силата што болидите ја добиваат од моторот со внатрешно согорување и електричниот погон.
Односот, кој оваа сезона изнесува 53:47, следната година ќе биде променет на 58:42, а од 2028 година на 60:40 во корист на моторите со внатрешно согорување. Поради тоа се очекува поголема потрошувачка на гориво, што претставуваше проблем за дел од тимовите кои сакаат да ги задржат сегашните шасии и да ги намалат трошоците.
Бидејќи резервоарот за гориво е сместен во шасијата, неговото зголемување не би било едноставно решение. Постоеше реална опасност некои болиди со сегашната конфигурација да не можат да ја завршат трката со досегашната должина. ФИА истовремено усвои и нови правила за трките што ќе бидат прекинувани поради дожд, инциденти или несреќи.
И понатаму ќе остане ограничувањето од максимум два часа активно тркање, но досегашното правило според кое целиот настан мораше да заврши во рок од три часа ќе биде заменето со т.н. „hard stop“ време. Тоа значи дека крајниот рок за завршување на трката повеќе нема да биде идентичен на сите патеки, туку ќе зависи од локалните услови. Ноќните трки, на пример, ќе имаат поголема временска флексибилност во однос на дневните трки каде што зајдисонцето може да претставува ограничувачки фактор.
Дополнително, договорена е и поголема флексибилност околу продолжувањето на слободните тренинзи доколку бидат прекинати. Според сегашните правила, времето на тренингот продолжува да тече и при истакнато црвено знаме, за разлика од квалификациите и трките, а тоа во иднина ќе може полесно да се коригира.