• Саше Љолес
Возачот на Мерцедес, Џорџ Расел, триумфираше на трката за Големата награда на Канада, која ја одбележа судирот меѓу двајцата возачи на Мекларен, Ландо Норис и Оскар Пјастри.
Подебелиот крај го извлече Норис, кој постојано го „напаѓаше“ својот тимски колега, а Пјастри возврати кога се најдоа на стартно-целната рамнина и му го затвори просторот. Норис тргна во напад од внатрешната страна и покрај тоа што немаше доволно простор, па така дојде до контакт по кој мораше предвреме да ја заврши трката, за разлика од Пјастри, кој заврши како четврти на крајот.
Ова е првпат сезонава еден од возачите на Мекларен да не се најде на победничкиот подиум. Во генералниот пласман води Оскар Пјастри со 198 бодови, а зад него следуваат Ландо Норис со 176 и Макс Верстапен со 155 бодови. Следната трка ќе се вози на 29 јуни во Австрија.